Important medicines selling at high prices
औषधांचा काळा बाजार जोरात
शहरात एकीकडे डेंग्यू, मलेरियासह संसर्गजन्य तापाच्या साथी पसरल्या आहेत. त्यातच जीवरक्षक औषधांसह प्रतिजैविके, डायबेटिस, ब्लडप्रेशरवरील औषधांचा तुडवडा निर्माण झाला आहे. औषधांचा पुरवठा १५ ते २० टक्क्यांनी घटला आहे. ब्लडप्रेशर, डायबेटिस, डोळ्यांची औषधे ठराविक मात्रेत रोज घ्यावीच लागत असल्याने काही औषधविक्रेत्यांकडून ही औषधे १५ ते २० टक्के वाढीव किंमतीमध्ये विकली जात आहेत.
शहरातील औषध विक्रेत्यांच्या संघटनांनी तुडवडा असलेली औषधे व प्रतिजैविकांबद्दल संबधित औषध कंपन्याकडे वारंवार विचारणा करूनही तुटवड्याचे नेमके कारण स्पष्ट केले जात नाही. एकूण १०८ जीवरक्षक औषधांच्या किंमतीवरील नियंत्रण उठवण्याबाबत केंद्र सरकारने दिलेल्या निर्देशामुळे ही परिस्थिती उद्भवल्याचे महाराष्ट्र केमिस्ट असोसिएशनचे अध्यक्ष दिलीप मेहता मान्य करतात. औषधांच्या किंमतीमधील बदलांमुळे उप्तादक कंपन्यांनी औषधांचा पुरवठा करणे थांबवले आहे, तर काहींनी नव्या वाढीव किमतीसह छपाई करण्यासाठी राज्याबाहेरील मध्यस्थांची मदत घेतली आहे.
काही बहुराष्ट्रीय औषध कंपन्यांची जीवरक्षक इंजेक्शन्स व पेशी वाढवणाऱ्या औषधांचा शहरात सर्वाधिक तुटवडा जाणवत आहे. या औषधांसाठी पर्यायी औषधे डॉक्टरांकडून दिली जात असली, तरीही वापरात असलेल्या जुन्या औषधांसाठी भरमसाठ किंमत मोजावी लागत आहे. दरम्यान, कोणत्याही औषध विक्रेत्याने पेशंटना वेठीस धरून वाढीव किमतीने औषधे विकल्यास त्यावर कारवाई होईल, असे केमिस्ट असोसिएशनने स्पष्ट केले आहे.
तुटवडा असलेली, वाढीव किंमतीने विकली जाणारी औषधे
डोळ्यांमध्ये घालायचे मॉक्सिसिप ड्रॉप्स
संसर्ग रोखणारी न्यूओस्पोरिन पावडर
रक्तदाबासाठी घेतली जाणारी सेलोमॅक्स गोळी
डायबेटिसवरील ओझोमेट, ड्रायगोलीन एलडीटू
मानसिक आजारांसाठीची किपकॉन ०.५
श्वसनविकारासाठी फॉर्मोसॉन १०० रोटाकॅप (कॅप्सुल )
थायरॉईडसाठी अल्ट्रॅक्सिन ७५
प्लेटलेट वाढवणारे अल्बोमिन इंजेक्शन
ग्लिमिस्टार ४ मि.ली
डी थ्री अप टॅब - व्हिटॅमिन
सिलिन ५०० -व्हिटॅमिन सी
सुपाट्रेट ०.४३ त्वचाविकार क्रीम
No comments:
Post a Comment